སྐུ་དྲིན་ཆེ་དང་། བཀའ་དྲིན་ཆེ་དང་། ཐུགས་རྗེ་ཆེ་གསུམ་པོའི་ཁྱད་པར།

༄༅། །སྐུ་དྲིན་ཆེ་དང་། བཀའ་དྲིན་ཆེ་དང་། ཐུགས་རྗེ་ཆེ་གསུམ་པོ་ནི། རིམ་པ་བཞིན། སྐུ་ཡི་དྲིན་དང་། གསུང་གི་དྲིན་དང་། ཐུགས་ཀྱི་དྲིན་གསུམ་པོ་ལ་སྦྱོར་དགོས་པ་ཡིན་ཏེ། དེ་ཡང་། དྲིན་གསུམ་པོ་འདི་དག་གི་ཐོག་ནས་ཕ་རོལ་པོས་རང་ཉིད་ལ་ཕན་བཏགས་པའི་ལན་དུ། སྐུ་ཡི་སྒོ་ནས་དྲིན་ཆེ་བ་ལ་སྐུ་དྲིན་ཆེ་དང་། གསུང་གི་སྒོ་ནས་དྲིན་ཆེ་བ་ལ་བཀའ་དྲིན་ཆེ་དང་། ཐུགས་ཀྱི་སྒོ་ནས་དྲིན་ཆེ་བ་ལ་ཐུགས་རྗེ་ཆེ་ཞེས་དགའ་ཚོར་དང་བཅས་པས་ཞུ་དགོས་ལ། ལར་ལུས་ངག་གི་བྱ་བ་མཐའ་དག་སེམས་ཀྱི་རྗེས་སུ་འགྲོ་ཞིང་། སེམས་ཀྱིས་ཀུན་ནས་བསླངས་ཏེ་འབྱུང་བ་ཡིན་པས། སྒོ་གསུམ་གང་གི་སྒོ་ནས་ཕན་བཏགས་ཀྱང་དེའི་ལན་དུ་ཐུགས་རྗེ་ཆེ་ཞེས་རྗོད་ཆོག་ཀྱང་། སྐུ་དྲིན་ཆེ་དང་། བཀའ་དྲིན་ཆེ་ཞེས་པ་ནི་སྐབས་འབྲེལ་དང་བསྟུན་དགོས་པ་ཡིན་ཏེ། སྐུ་ཡི་ངལ་རྩོལ་ཤས་ཆེ་སར་སྐུ་དྲིན་ཆེ་དང་། གསུང་གི་ངལ་རྩོལ་ཤས་ཆེ་སར་བཀའ་དྲིན་ཆེ་ཞེས་བརྗོད་པར་བྱའོ། །

    དཔེར་ན། དྲིན་ཅན་གྱི་ཕ་མ་ནི། ལུས་རྟེན་འདིའི་བདག་རྐྱེན་དང་། སྙོར་སྐྱོང་མཛད་མཁན་ཡིན་པས། སྐུ་ཡི་དྲིན་ཤས་ཆེ་བའི་ཆ་ནས་སྐུ་དྲིན་ཆེ་བ་དང་། བཀའ་དྲིན་གསུམ་ལྡན་གྱི་རྩ་བའི་བླ་མ་ནི། སྐལ་ལྡན་གྱི་སློབ་མ་ལ་དབང་བསྐུར་པ་དང་། རྒྱུད་བཤད་པ་དང་། མན་ངག་བསྟན་པའི་སྒོ་ནས་གསུང་གི་དྲིན་ཤས་ཆེ་བས། བཀའ་དྲིན་ཆེ་བ་དང་། བྱང་ཆུབ་སེམས་དཔའ་རྣམས་ནི་ཚད་མེད་བཞིའི་སྒོ་ནས་རིས་མེད་ཕྱོགས་བྲལ་གྱི་མཛད་པ་སྐྱོང་བས། སེམས་ཅན་ཐམས་ཅད་ལ་ཐུགས་རྗེའི་དྲིན་ཤས་ཆེ་བའི་ཆ་ནས་ཐུགས་རྗེ་ཆེ་བའོ། །མདོར་ན། གང་ཞིག་ཤས་ཆེ་བ་དེ་ཉིད་བྱེ་བྲག་ཏུ་རྩལ་འདོན་བྱས་ན་འདི་ལྟར་ཡིན་གྱི། སྤྱིར་བཏང་ནི་ཕན་འདོགས་པའི་བྱ་བ་ཐམས་ཅད་ཐུགས་རྗེའི་ཀློང་ལས་མ་འདས་པ་ཡིན་པས། ཀུན་ཁྱབ་ཏུ་ཐུགས་རྗེ་ཆེ་ཞེས་བརྗོད་པར་བྱའོ། །

    ད་དུང་དཔེ་གོ་བདེ་བ་ཞིག་བྱས་ན། ཁྱེད་ཀྱིས་ཅ་ལག་དེ་དག་དུས་ཐོག་ཏུ་བསྐྱལ་པ་ལ་སྐུ་དྲིན་ཆེ། ཁྱེད་ཀྱིས་གནད་དོན་འདིའི་ཐད་ལམ་སྟོན་གནང་བ་ལ་བཀའ་དྲིན་ཆེ། ཁྱེད་ཀྱིས་ངའི་གནས་སྟངས་ཐོག་བསམ་ཤེས་གནང་བ་ལ་ཐུགས་རྗེ་ཆེ། ཞེས་པ་ལྟ་བུའོ། །འདིའི་སྐོར་ལ་དེ་སྔོན་བོད་ཀྱི་ཚིག་མཛོད་གང་དུའང་ཞིབ་འགྲེལ་བྱས་པ་ནི་མ་མཐོང་ངོ་། །སྤྱི་ལོ་ཟླ་ཚེས་ ༢༠༢༢/༡༡/༡༧ ཉིན།

ཨི་ཏི་ཨ་ཏིར་བཅོས་པའི་ནོར་འཁྲུལ།

༄༅། །རྙིང་རྒྱུད་བཀའ་འགྱུར་ནང་དུ་མ་བཞག་པའི་རྒྱུ་མཚན། ཞེས་པའི་དཔྱད་རྩོམ་ཕྱི་ལོ་ཟླ་ཚེས་ ༢༠༡༤-༡༡-༢༧ ལ། དོལ་པོ་སྤྲུལ་སྐུ་ཤེས་རབ་བཟང་པོས་སྤེལ་པ་དེའི་ནང་། “ཨ་ཏི། སྔགས་ནང་པའི་འགྱུར་བྱང་གཞན་ན་བཞུགས། ཞེས་འཁོད་ཡོད། ཚིག་ཐུང་ངུ་འདིར་བསམ་གཞིག་མང་པོ་མི་དགོས་པར་ཧ་གོ་ཆོག་ཆོག་ཡོད་པ་ནི་ཚིག་འབྲུ་གསུམ་ཡོད། ༡ ཨ་ཏི་སྔགས་ནང་པ། ༢ འགྱུར་བྱང་། ༣ གཞན་དུ་ཡོད་ཅེས་པ་འདི་གསུམ་ཡིན།” ཞེས་དང་། “དང་པོ་ཨ་ཏི་སྔགས་ནང་པ་ཞེས་པས་སྔ་འགྱུར་ཟབ་མོའི་རྒྱུད་སྡེ་རྣམས་ངོས་བཟུང་བ་དང་།” ཞེས་དཀར་ཆག་འཕང་ཐང་མའི་ལུང་འདྲེན་དང་འགྲེལ་བརྗོད་བཀོད་པ་ལ། ནོར་འཁྲུལ་འདི་ཡོད་དེ། དཀར་ཆག་གི་མཇུག་ཏུ་གསལ་བའི་ཚིག་དེ། ཨི་ཏི། སྔགས་ནང་པའི་འགྱུར་བྱང་གཞན་ན་བཞུགས།། །།ཞེས་འཁོད་ཡོད་པ་ལས། ཨ་ཏི། སྔགས་ནང་པའི་འགྱུར་བྱང་གཞན་ན་བཞུགས། ཞེས་འཁོད་མེད་ཀྱང་། ལུང་ཚིག་དང་། ལུང་འགྲེལ་གཉིས་ཀའི་ནང་། (इति) ཨི་ཏི་ནས་ (अति) ཨ་ཏིར་བཅོས་པ་འདི་ནོར་བ་ཚབས་ཆེན་དུ་གྱུར་ཡོད། ལར་མང་པོ་ཞིག་གིས། དཀར་ཆག་འཕང་ཐང་མའི་ནང་། “ཨི་ཏི། སྔགས་ནང་པའི་འགྱུར་བྱང་གཞན་ན་བཞུགས།། །།” ཞེས་པའི་ཚིག་དུམ་འདིའི་འགྲེལ་བརྗོད་བྱེད་སྐབས། ནང་རྒྱུད་བླ་མེད་ཀྱི་གཞུང་ལུགས་སྤྱི་དང་། ཁྱད་པར་ཤིན་ཏུ་རྣལ་འབྱོར་གྱི་རྒྱུད་སྡེ་སྟེ། ཨ་ཏི་ཡོ་གའམ། རྫོགས་པ་ཆེན་པོའི་ཆོས་སྐོར་ཡང་དག་ཡིན་པའི་སྒྲུབ་བྱེད་དུ་ཚིག་འདི་ཆེད་བཅོས་ཀྱིས་འདྲེན་གྱིན་ཡོད་པའང་། རྒྱ་གར་སྐད་ཀྱི་ (इति) ཨི་ཏི་ཞེས་པའི་ཚིག་གི་གོ་དོན་ལ་རྣམ་པར་རྨོངས་པའི་མཇུག་འབྲས་སུ་ངེས་སོ།། །།

རྟགས་འགྲེལ་ནོར་བུའི་མེ་ལོང་ལས། ཞར་བྱུང་དུ་ཡི་གེའི་འཇུག་པ་སྤྱིའི་དགོས་པ་བཤད་པའི་སྐབས་དོན་ལ་དཔྱད་པ།

༄༅། །རྟགས་འཇུག་རྩ་བ་ལས། མོ་ཡི་ཡི་གེ་མེད་པ་ན། །ཕོ་ཡིག་བརྗོད་པ་མེད་པར་འགྱུར། །ཕོ་ཡིག་དེ་དག་རྣམས་ལ་ཡང་། །འཇུག་པར་བཅས་པ་མེད་པར་ནི། །མིང་དང་ཚིག་ཀྱང་གསལ་མི་ནུས། །མིང་ཚིག་གསལ་བ་མེད་ན་ནི། །དོན་རྣམས་བརྗོད་པར་མི་འགྱུར་རོ། །ཞེས་པའི་བསྟན་དོན་སྐོར་ཅུང་ཟད་དཔྱད་པར་བྱ་བ་ལ། རྩ་བ་ལས། མོ་ཡི་ཡི་གེ་མེད་པ་ན། །ཕོ་ཡིག་བརྗོད་པ་[1]མེད་པར་འགྱུར། །ཞེས་པའི་བསྟན་དོན་དུ་ནོར་བུའི་མེ་ལོང་ལས། མོ་ཡི་ཡི་གེ་ཨཱ་ལི་མཚོན་བྱེད་གི་གུ། ཞབས་ཀྱུ། འགྲེང་བུ། རྣ་རུ་བཞི་མེད་པ་ན། ཞེས་ཡོངས་གྲགས་ཀྱི་དབྱངས་བཞིར་བཀྲལ་ནའང་། དབྱངས་བཞི་པོ་དེ་དག་མེད་པ་ཙམ་གྱིས་ནི་མཐའ་གཅིག་ཏུ་ཕོ་ཡིག་གི་བརྗོད་པ་རྣམས་མེད་པར་འགྱུར་ཚུལ་སུས་ཀྱང་དམ་བཅའ་བར་མི་ནུས་ལ།  དེར་བརྟེན། ཕོ་ཡིག་ཀཱ་ལི་རྣམས་ཀྱི་བརྗོད་པ་ཕལ་ཆེར་མེད་པར་འགྱུར་ལ། ཞེས། ཕལ་ཆེར་ཞེས་པའི་སྒྲ་གསར་སྣོན་མཛད་ཅིང་།  ཕལ་ཆེར་ཞེས་པའི་ཚིག་འདིའི་ནུས་སྟོབས་ལ་བསམས་ན།

རྣམ་ཤེས་མིན་པ་རྣམ་ཤེས་ཀྱི། །ཉེར་ལེན་མིན་པའི་ཕྱིར་ཡང་འགྲུབ། །ཅེས་པའི་གཏམ་ལས་འཕྲོས་ཏེ་དེང་དུས་ཀྱི་རིག་གསར་པ་རྣམས་ལ་སྔར་ཡོད་རིགས་པ་དེ་དག་གིས་སྐྱེ་བ་སྔ་ཕྱི་སྒྲུབ་ཐུབ་མིན་གྱི་སྐོར།

༄༅། །ནམོགུརུམཉྫུཤྲཱིཀུམཱརབྷཱུཏཱཡ། འགྱུར་མེད་གཡུང་དྲུང་ཆོས་སྐུའི་ཀློང་ནས་མཁྱེན་གཉིས་འོད་ཟེར་འབུམ་གྱི་གཟི།།

མ་རིག་མུན་པའི་གཤེད་དུ་འཆར་བས་འགྲོ་ཀུན་སྣང་བའི་ལམ་མཆོག་ལ།།

འདྲེན་པའི་བྱེད་པོ་མཆོག་ཏུ་བསྔགས་དེས་བདག་བློ་ཆུ་སྐྱེས་གསར་པའི་ཚལ།།

སྤོབས་པའི་འདབ་སྟོང་ཕྱོགས་མཐར་འབྱེད་པའི་དགེ་ལེགས་སྣང་བ་དེང་འདིར་སྩོལ།།

འདི་ན་ཐ་སྙད་རིགས་པར་སྨྲ་བའི་རྒྱུ་སྐར་གྲངས་ཀྱིས་མི་ལོང་ཡང༌།།

ཆེས་ཆེར་འཕགས་པའི་རི་བོང་འཛིན་ལྟར་བློ་གྲོས་དཀྱིལ་འཁོར་རབ་རྫོགས་ཏེ།།

འཁྲུལ་མེད་ལེགས་བཤད་འོད་སྣང་དམ་པས་ལོག་རྟོག་ཚ་གདུང་འཇོམས་པ་ལ།།

དྷརྨ་ཀཱིརྟིའི་མཛད་པར་འགྲན་པའི་བཤེས་གཉེན་ཀུན་ལའང་དད་ཕྱག་བརྩེགས།།

ཞེས་སྲོལ་བཟང་གི་འགྲོས་སྔོན་དུ་བཏང་ནས་གོང་གསལ་གྱི་བརྗོད་གཞིའི་སྐོར་ལས་འཕྲོས་ཏེ་ཕྱི་རོལ་རྒྱང་འཕེན་པའི་ངོར་སྐྱེ་བ་སྔ་ཕྱི་ཡོད་པར་སྒྲུབ་བྱེད་ཀྱི་རིགས་པའི་རྣམ་གྲངས་ཇི་སྙེད་པ་འདི་དག་གི་ལམ་ནས་དེང་རབས་ཀྱི་རིག་གསར་དུ་གྲགས་པའི་ཚན་རིག་གི་ངོར་འཇིག་རྟེན་སྔ་ཕྱི་ཡོད་པའི་སྒྲུབ་བྱེད་རྣམ་དག་ཅིག་འགོད་ཐུབ་བམ་མི་ཐུབ་ཅེས་པའི་དོགས་དཔྱོད་འདི་སྐབས་ཐོབ་ཀྱི་གླེང་གཞི་གཙོ་བོ་ཡིན་ལ། སྤྱིར་གནའ་དེང་གི་རིགས་པའི་རྣམ་གཞག་ལ་ཚུལ་བཞིན་ལྟ་བའི་ཤེས་རབ་ཀྱི་འདྲེན་བྱེད་དང་བྲལ་བ་ཞིག་གིས་རིགས་སྨྲ་མཁས་དབང་བརྒྱ་ཕྲག་གི་དབུས་སུ་ཇི་ལྟར་སྨྲ་ནའང་། ལོང་བས་གླང་ཆེན་གྱི་གཟུགས་ལ་གཞལ་བའི་དཔེ་ཟླར་འགྱུར་བ་ལས་མ་འདས་པས། གཟུར་གནས་བློ་གྲོས་ཀྱི་དཔལ་ལ་དབང་བ་དག་གིས་བཞད་གད་ཀྱི་ཡུལ་ལས་མ་གྱུར་མོད།