གདམས་ཟབ་གནད་ཀྱི་མདོ་འགག་དྲུག

༄༅། །སྐྱིད་ན་མི་དགའ་སྡུག་ན་དགའ། །སྐྱིད་ན་ཉོན་མོངས་དུག་ལྔ་འབར། །སྡུག་ན་སྔོན་བསགས་ལས་ངན་འཛད། །སྡུག་བསྔལ་བླ་མའི་ཐུགས་རྗེ་ཡིན། །བསྟོད་ན་མི་དགའ་སྨད་ན་དགའ། །བསྟོད་ན་ང་རྒྱལ་ཁེངས་སེམས་ཆེ། །སྨད་ན་རང་སྐྱོན་ཐེར་ལ་འབུད། །མི་ཁ་ལྷ་ཡི་ཕ་འབབ་ཡིན། །མཐོ་ན་མི་དགའ་དམའ་ན་དགའ། །མཐོ་ན་ཕྲག་དོག་ང་རྒྱལ་སྐྱེ། །དམའ་ན་བག་ཡངས་དགེ་སྦྱོར་འཕེལ། །དམན་ས་གོང་མའི་གདན་ས་ཡིན། །འབྱོར་ན་མི་དགའ་རྒུད་ན་དགའ། །འབྱོར་ན་གསོག་སྲུང་སྡུག་བསྔལ་ཆེ། །རྒུད་ན་དཀའ་སྤྱད་ལྷ་ཆོས་འགྲུབ། །སྤྲང་ལུས་ཆོས་པའི་གཏད་སོ་ཡིན། །བྱིན་ན་མི་དགའ་ཕྲོག་ན་དགའ། །བྱིན་ན་ལན་ཆགས་འཁུར་པོ་འཕེལ། །འཕྲོག་ན་ཚེ་རབས་བུ་ལོན་སོད། །ཆོག་ཤེས་འཕགས་པའི་སྤྱི་ནོར་ཡིན། །གཉེན་ལ་མི་དགའ་དགྲ་ལ་དགའ། །གཉེན་གྱིས་ཐར་ལམ་བར་དུ་གཅོད། །དགྲ་བོ་བཟོད་པའི་ཡུལ་དུ་བྱེད། །རོ་སྙོམས་ཉམས་ལེན་གནད་འགག་ཡིན། །ཆོས་བཞིན་མཛད་ན་དེ་འདྲ་དགོས། །བློ་ཐག་ཆོད་ན་དེ་འདྲ་དགོས། །རི་ཁྲོད་འཛིན་ན་དེ་འདྲ་དགོས། །རྒྱལ་ཁམས་འགྲིམ་ན་དེ་འདྲ་དགོས། །གདམས་ཟབ་གནད་ཀྱི་མདོ་འགག་དྲུག །ཕ་གཅིག་བླ་མའི་ཞལ་རྒྱུན་ཡིན། །བུ་གཅིག་སེམས་ཀྱི་གཏད་སོ་ཡིན། །སྙིང་གི་སྙིང་པོ་ཚིག་དྲུག་འདི། །གྲོགས་གཅིག་ཁྱོད་རང་མ་ལགས་པ། །གཞན་ལ་ཚིག་ཟུར་ཕུད་པ་མེད། །རྫ་དཔལ་སྤྲུལ་ཨོ་རྒྱན་འཇིགས་མེད་ཆོས་ཀྱི་དབང་པོས་མཛད་པའི་གཏམ་པདྨའི་ཚལ་གྱི་ཟློས་གར་ལས་ཟུར་བཀོལ་ཞུས་པའོ།། །།

ཐོག་མཐའ་བར་གསུམ་དུ་དགེ་བའི་གཏམ་ལྟ་སྒོམ་སྤྱོད་གསུམ་ཉམས་ལེན་དམ་པའི་སྙིང་ནོར།

མཛད་པ་པོ། ༸རྫ་དཔལ་སྤྲུལ་རིན་པོ་ཆེ་ཨོ་རྒྱན་འཇིགས་མེད་ཆོས་ཀྱི་དབང་པོ།

༄༅༅། །ན་མོ་ལོ་ཀེ་ཤྭ་རཱ་ཡ། གང་མཚན་བདུད་རྩིའི་ཟེགས་མ་གཅིག་ལྷུང་བས། །ཚེ་རབས་དུ་མར་རྣ་བར་ཆོས་ཀྱི་སྒྲས། །འགེངས་པའི་ངོ་མཚར་རིན་ཆེན་རྣམ་གསུམ་ཞེས། །གྲགས་པའི་དཔལ་དེས་ཀུན་ཏུ་ཤིས་གྱུར་ཅིག །གང་ཞིག་སྟོན་གྱི་དུས་ན་ཨ་མྲའི་འབྲས། །ཁ་ཅིག་ནང་མ་སྨིན་ཀྱང་ཕྱི་སྨིན་འདྲ། །སྣང་བ་དེ་ལྟར་ཆོས་པའི་གཟུགས་བརྙན་བདག །སེམས་དང་ཆོས་མ་འདྲེས་ཕྱིར་ཆོས་གཏམ་དཀོན། །དེ་ལྟ་ན་ཡང་དམ་པ་ཁྱེད་ཀྱི་བཀས། །བསྐུལ་པའི་ནན་མ་ལྡོག་ཕྱིར་དྲང་པོའི་ངག །སྙིགས་སྤྱོད་ཕལ་པའི་ཚུལ་དང་མི་མཐུན་པར། །གཡོ་སྒྱུ་མེད་པའི་སེམས་ཀྱིས་གསོལ་འདིར་དགོངས།།

ཆོས་མཐུན་འཆང་བཟའི་མཇུག་ཏུ་དམ་ཚིག་གཙང་མས་སྐྱོང་དགོས་པར་གདམས་པ།

མཛད་པ་པོ། ཤར་པ་བླ་མ་སངས་རྒྱས་བསྟན་འཛིན། ༡༩༢༤-༡༩༩༠ 
ནེ་ཤར་ལོ་རྒྱུས་ཇོ་གླང་གངས་འོད་ནས་ཟུར་བཀོལ་ཞུས།

༄༅། །ཤར་པའི་ལུགས་སྲོལ་ཤེས་ནས་སྐྱོང་བ་ནི་ཤིན་ཏུ་ལེགས་པ་ཡིན། མི་རིགས་རང་རང་གི་ལུགས་སྲོལ་མི་ཤེས་པ་དང་། ཤེས་ཀྱང་སྤོང་བ་ནི་མི་རིགས་ཀྱི་ཐ་ཤལ་ཆོས་དང་འཇིག་རྟེན་གཉིས་ཀ་ལས་ཉམས་པའི་རྟགས་ཡིན་ནོ། །གཏམ་དཔེ་ལས། ར་ར་ས་དང་ལུག་ལུག་ས་བཟུང་ན་དགའ། ཟེར་བ་ཡོད། དེ་མིན་ར་མགོ་ལུག་སྦྱར་དང་། རྒྱ་མིན་བོད་མིན་བྱེད་པ་ནི་ཐན་དང་ལྟས་ངན་གྱི་སྣ་འདྲེན་ཡིན་པར་བཤད་དོ། །དེ་ལྟར་ཡིན་པ་ཡང་། སྔོན་གྱི་མཁས་པ། ལྷ་ཆོས་དང་མི་ཆོས། ཡ་རབས་དང་མ་རབས། བཟང་པོ་དང་ངན་པ། བདེ་བ་དང་ཕུང་བ་སོགས་ཤན་འབྱེད་པའི་དབང་པོར་གྱུར་པ་རྣམས་ཀྱིས་འདི་ལྟར་གསུངས་ཏེ།

ཤར་པ་རྣམས་ལ་ཕན་པའི་བྱ་མ་རྟ།

མཛད་པ་པོ། ཤར་པ་བླ་མ་སངས་རྒྱས་བསྟན་འཛིན། ༡༩༢༤-༡༩༩༠ 
ནེ་ཤར་ལོ་རྒྱུས་ཇོ་གླང་གངས་འོད་ནས་ཟུར་བཀོལ་ཞུས། 

གུ་རུ་ཡིད་བཞིན་ནོར་བུར་ཕྱག་བཙལ་ནས།།
ཤར་པ་རྣམས་ལ་ཕན་པའི་གྲོས་ཤིག་འདེབས།།
ཆོས་འབྱུང་མེས་རབས་ཚུལ་དུ་བཤད་ཟིན་ཀྱང་།།
ལ་ལས་གོ་དཀའ་འཕྲལ་ཕན་འདི་རྣམས་ཡིན།།

ཀུན་མཁྱེན་ཀློང་ཆེན་རབ་འབྱམས་པའི་གསུང་རབ་མཛོད་བདུན་ལ་བལྟ་བར་བསྐུལ་པ།

མཛད་པ་པོ། རྫ་དཔལ་སྤྲུལ་རིན་པོ་ཆེ་ཨོ་རྒྱན་འཇིགས་མེད་ཆོས་ཀྱི་དབང་པོ། ༡༨༠༨-༡༨༨༧

༄༅། །ནམཿསརྦཛྙཱཡ། གདོད་ནས་རབ་ཞི་གཉུག་མ་བརྡལ་བའི་ཞིང༌། །རྟག་ཏུ་མི་གཡོ་ཡེ་ཤེས་ཆོས་སྐུའི་ཀློང༌། །དགོངས་པའི་རྩལ་ཆེན་རྫོགས་པའི་སྣང་འགྲོས་ཅན། །ཀུན་མཁྱེན་བླ་མ་དེ་ལ་ཕྱག་འཚལ་ལོ། །ཀྱེ་ལགས་ཡོན་ཏན་མཆོག་གི་རང་བཞིན་ནི། །དམ་པའི་གཞུང་ལ་མ་བརྟེན་རང་བཟོས་མིན། །རྒྱ་མཚོ་ཆེ་ལས་ནོར་བུ་མཆོག་འབྱུང་གི །དམན་པའི་ཡུལ་ལས་རང་གར་ཅི་ཞིག་རྙེད། །རྟོགས་པའི་ཡེ་ཤེས་ཉི་མ་སྣང་བ་ཡང༌། །བྱིན་བརྒྱུད་མ་ཉམས་བླ་མའི་མན་ངག་ལས། །ངེས་པར་འོང་གི་སྟོང་སྒོམ་མུན་རྡོ་བ། །ལེགས་པའི་ལམ་དུ་རྣལ་མར་འགྲོ་བ་ཉུང༌། །