རྣམ་དཔྱོད་འོད་སྣང་འཇོམས་པའི་སྨག་རུམ།

༄༅། །མ་ལ་ཡ་ཡི་ནགས་སུ་མ་འཁྲུངས་ཤིང་།།
སྲ་བརྟན་འཛིན་མར་རྩ་བ་ཚུགས་མིན་ཡང་།།
སྲིད་གསུམ་གྲངས་ཀྱི་ལོ་འདབ་གཡོ་བ་ལས།།
རྩ་བའི་གདུང་བ་སེལ་བའི་གཉེན་པོ་ཅི།།

མཐོ་སློབ་ཁང་དུ་ཐོག་མར་འབྱོར་ནས་བཟུང་།།
ཇི་སྲིད་གནས་བར་ཀུན་ལ་རིས་མེད་ཀྱིས།།
སྒྲིགས་གཞིའི་དུས་ཚོད་རྣམ་ཀུན་ངོ་སྤྲོད་ལ།།
འཚེར་མེད་གྲོགས་བཟང་རྟ་རྔའི་སྲོག་འཛིན་གང་།།

བསླུ་མེད་དྲང་སྲོང་རྒྱལ་པོའི་ཞལ་སྔ་ནས།།
བདེན་དོན་གཤིས་ཀྱི་ལུགས་དང་འགལ་བ་ཡི།།
མི་བདེན་རྫུན་གྱི་འཁོར་ལོ་བསྐོར་ན་ཡང་།།
རྫུན་མིན་དྲང་པོའི་ཐ་སྙད་འདོགས་མཁན་སུ།།

གྲངས་མེད་སྡུག་བསྔལ་གསུམ་གྱི་འབབ་ཆུའི་རྒྱུན།།
གཅིག་ཏུ་བཞུར་བ་སྲིད་པའི་ཆུ་ཀླུང་ཆེར།།
བརྒལ་བར་མི་ནུས་འགྲོ་ཀུན་འདྲེན་པའི་མགོན།།
ལྕགས་ཟམ་ཐ་སྙད་ཐོགས་པའི་རྣལ་འབྱོར་སུ།།

བྱང་ཁྱུང་ལྡིང་སྐོར་བྱེད་པའི་གནམ་འོག་ནས།།
དུད་འགྲོའི་མགོ་ལ་རྣ་བ་ཡ་གཅིག་ཅན།།
སྟག་ཤར་བུ་སྤུན་རྣམ་ལྔའི་ཐ་ཆུང་གིས།།
མ་གཅིག་བར་མར་འཁྲིད་པའི་ཡིག་འབྲུ་གང་།།

དྲང་པོའི་རིགས་ལ་དགའ་བའི་ཞེན་ཆགས་དང་།།
འཁྱོག་པོའི་རིགས་ལ་སྡང་བའི་ངང་ཚུལ་གཉིས།།
མེད་ཀྱང་དྲང་པོའི་བྱ་བ་ཁོ་ན་ལས།།
རིས་མེད་འཇུག་པའི་ནུས་བྲལ་བེམ་པོ་ཅི།།

གྲངས་མེད་གསུམ་གྱི་ཚོགས་ཀྱང་མ་བསགས་ཤིང་།།
སྒྲིབ་གཉིས་འཁོར་བའི་མུན་སྟུག་བཅོམ་མིན་ལ།།
སྐུ་གཉིས་ཟུང་གི་དོན་འབྲས་མ་སྨིན་ཀྱང་།།
འབད་མེད་འགྲོ་བའི་རེ་སྐོང་དེ་འདྲ་ཅི།།

སེམས་མེད་བེམ་པོ་ཡིན་ཕྱིར་ལྷག་བསམ་གྱིས།།
གཞན་དོན་སྒྲུབ་པའི་བློ་དཀར་མེད་ན་ཡང་།།
དུས་འདིར་རང་གཞན་དོན་རྣམས་སྒྲུབ་པ་ལ།།
མེད་ཐབས་མེད་པའི་དངོས་པོར་བསྔགས་དེ་ཅི།།
པདྨའི་རང་མདངས་འདོན་ཐེངས་བདུན་པའི་གབ་ཚིག་རིག་པའི་རོལ་རྩེད་ལས་སོ།།