༄༅། །ཀ་དག་སྤྲོས་བྲལ་ཆོས་དབྱིངས་ཕོ་བྲང་གི་ཕྱོགས་ནས།།
ཁ་བ་རི་བའི་གདུལ་བྱར་བསམ་བཞིན་དུ་བྱོན་པའི།།
ག་བུར་ཚུལ་ཁྲིམས་དྲི་འཐུལ་རྩ་གསུམ་གྱི་ངོ་བོ།།
ཅ་ཅོ་མི་མངའི་གསུང་མཆོག་འགྲོ་ཀུན་ལ་སྟོན་ཞིང༌།།
ཆ་ལུགས་ངེས་མེད་གང་འདུལ་བསམ་བཞིན་དུ་སྤྲུལ་ནས།།
ཇ་ཡུན་ཙམ་ཡང་ལྷོད་མེད་འགྲོ་དོན་ལ་བརྩོན་པའི།།
ཉ་གང་འཛུམས་ལྡན་དགྲ་གཉེན་རིས་མེད་ཀྱི་ཕ་མ།།
ཏ་ཐཱ་ག་ཏའི་རིང་ལུགས་སྲིད་གསུམ་ན་བསྒྲེངས་ཤིང༌།།
ཐ་དད་འགྲོ་བའི་བློ་ངོར་གང་འཚམས་ཀྱིས་ངང་ནས།།
ད་ལྟ་མ་འོངས་དུས་གསུམ་འཁོར་བ་ཡི་སྡུག་བསྔལ།།
ན་ཀྲའི་གྲོང་ནས་འགྲོ་ཀུན་འདྲེན་བྱེད་ཀྱི་དེད་དཔོན།།
པ་ཐུར་བཞིན་དུ་ལྟ་ངན་རི་རྩེ་ལ་གནས་པའི།།
ཕ་རོལ་རྒོལ་བའི་ལོག་རྟོག་ལྷག་མེད་དུ་བཅོམ་སྟེ།།
བ་ལ་ཧ་བཞིན་རིགས་དྲུག་སྲིན་པོ་ཡི་གླིང་ནས།།
མ་རྒན་ཞིང་དུ་འདྲེན་མཛད་རྟ་མཆོག་གི་རྒྱལ་པོ།།
ཙཀྲ་བཞིན་དུ་རྣམ་ཀུན་ལས་ཉོན་གྱི་དབང་ལས།།
ཚ་གྲང་འཁོར་བའི་གནས་འདིར་དབང་མེད་དུ་འཁོར་བའི།།
ཛ་དྲག་འགྲོ་བའི་དོན་ཕྱིར་འཁོར་བ་ཡི་གནས་འདིར།།
ཝ་ལེར་བྱོན་མཛད་མ་འདྲིས་འགྲོ་ཀུན་ཀྱི་མཛའ་བཤེས།།
ཞ་ར་ཐང་དཀྱིལ་ལུས་འདྲའི་འགྲོ་དྲུག་གི་སེམས་ཅན།།
ཟ་རྒྱག་སྤྱོད་གསུམ་ཙམ་ལ་བདེ་བ་རུ་རློམ་སྟེ།།
འ་ཆད་འཁོར་བའི་སྡུག་བསྔལ་བར་མེད་དུ་མྱོང་རྣམས།།
ཡ་ང་འཁོར་བའི་འཕྲང་ནས་འདྲེན་བྱེད་ཀྱི་ཕོ་ཉ།།
ར་ལང་ཆ་ལང་ཚུལ་མིན་སྤྱོད་པ་ལ་གཡེངས་ཏེ།།
ལ་ཐིགས་བཅད་འདྲའི་སྡུག་མྱོང་རིགས་དྲུག་གི་ཕ་མ།།
ཤ་ཁྲག་གཅིག་གི་སྤུན་བཞིན་བྱམས་བརྩེ་ཡིས་སྐྱོང་མཁན།།
ས་ཐོབ་བྱང་སེམས་རིགས་དྲུག་སེམས་ཅན་གྱི་མགོན་གཅིག།
ཧ་ཅང་མི་སྡུག་མ་དག་ངན་སོང་གི་ཡུལ་ལའང༌།།
ཧསྟི་མཚོ་ལ་འཇུག་པའི་བརྟུལ་ཞུགས་ཀྱི་ངང་ནས།།
ཧ་ལས་ལུས་སྲོག་ལྟོས་མེད་གཞན་དོན་ལ་བརྩོན་སོགས།།
ཧ་ཅང་བློ་ལས་འདས་པའི་མཛད་ཕྲིན་གྱི་མཐའ་འདི།།
ཨ་སྡུག་བུ་ངས་ལྟ་ཅི་དུས་གསུམ་གྱི་རྒྱལ་བས།།
ཨ་མཚར་ལྗགས་ཀྱི་དབང་པོས་བསྐལ་པ་ཡི་བར་དུ།།
ཨ་ལ་ཆོས་ཕུང་བརྒྱད་ཁྲིའི་ངང་ཚུལ་དུ་བརྗོད་ཀྱང༌།།
ཨ་ཧོ་བརྗོད་མཐའ་ཟིན་པའི་མཐར་འབྲས་དེ་ནམ་ཞིག།
ཕྱི་ལོ་ ༢༠༠༣ སྟོན་པའི་འདས་ལོ་ ༢༥༤༧ རབ་བྱུང་ ༡༧ ཆུ་ལུག་ལོའི་ཁྲུམས་སྟོད་ཟླ་བའི་དཀར་ཕྱོགས་རྫོགས་པ་གསུམ་པར་དགེ་རྒན་དཔལ་ལྡན་བློ་གྲོས་མཆོག་ནས་འཛིན་རིམ་གསུམ་པའི་སློབ་ཚན་སྙན་ངག་མེ་ལོང་མའི་བཤད་པ་ཟུར་ཁྲིད་གནང་བའི་སྐབས་སུ། བཀའི་སྐུལ་མ་སྤྱི་བོར་སོན་པ་བཞིན་བཤེས་གཉེན་གང་གི་སློབ་བུའི་གྲལ་མཐར་གཏོགས་པ་ཤར་ཕྲུག་ཚེ་རིག་པས་སུག་ལས་སུ་བསྟར་པ་དགེའོ།། །།
