༄༅། །ཨ་ཙི་ལས་ཀྱིས་སྤྲུལ་པའི་འཇིག་རྟེན་གྱི་གླིང་དུ། །ཧ་ལས་སྒྱུ་མའི་འཁྲུལ་སྣང་སྣ་ཚོགས་ལས་བྱུང་བའི། །ས་གནས་ཕྱི་ཡི་འཇིག་རྟེན་མཛེས་སྡུག་གི་སྟེང་ན། །ཤ་ཁྲག་སྒེར་གྱི་ལུས་རྟེན་སྣ་ཚོགས་རེ་འདུག་གོ །ལ་ལུང་ཕྱི་སྣོད་བཀོད་པའང་ལས་སྣང་དང་མཐུན་པར། །ར་རི་སེམས་ཀྱི་འཁྲུལ་སྣང་དག་མ་དག་དབང་གིས། །ཡ་མ་བརླ་ཡི་དོན་ལ་ཡག་སྡུག་གི་རྣམ་པ། །འ་ཅག་འགྲོ་བའི་སྣང་ཚུལ་མི་མཐུན་རེ་འདུག་གོ །ཟ་འཐུང་བདེ་སྐྱིད་དམིགས་ཡུལ་གཙོ་ཆེ་རུ་བཟུང་སྟེ། །ཞ་ར་ཞ་བོ་ཡན་ཆད་ཟ་ཟི་ཡི་ལས་ལ། །ཝ་ལེར་དྲན་དང་ལྷན་ཅིག་བྲེལ་འཚུབ་ངང་སྒྲུབ་ཀྱང་། །ཛ་དྲག་ཕྱི་མའི་དོན་དེ་དཀའ་མོ་རང་འདུག་གོ །ཚ་གྲང་ན་རཀ་ཡུལ་སོགས་ངན་འགྲོ་ཡི་གླིང་དུ། །ཙ་ར་བཅད་སོགས་མི་འདོད་སྡུག་བསྔལ་གྱི་མནར་གཅོད། །མ་གྱུར་མཁའ་མཉམ་འགྲོ་ལ་མྱོང་འདོད་དེ་མེད་ཀྱང་། །བ་ཐག་ལས་ཀྱིས་བཅིངས་ཚེ་ཐབས་མེད་རང་འདུག་གོ །ཕ་མཐའ་གྲངས་མེད་འགྲོ་ཀུན་ཐོག་མེད་ནས་ད་བར། །པ་ལགས་ཨ་མར་མ་གྱུར་གཅིག་མེད་དུ་ཡིན་ཀྱང་། །ན་ཚ་དུག་གསུམ་རྐྱེན་གྱིས་དགྲ་གཉེན་དུ་འཁྲུལ་ནས། །ད་བར་ཆགས་སྡང་ཕྱོགས་རིས་ངོ་ཤེས་རང་དཀའ་འོ། །ཐ་ཆད་བདག་སོགས་འགྲོ་རྣམས་དུག་གསུམ་གྱིས་མྱོས་ཏེ། །ཏ་ལེར་དྲན་ཚད་མི་དགེ་ཁོ་ན་རང་སྤྱོད་པས། །ཉ་གར་དགེ་སྡིག་འཇལ་བའི་ཆོས་རྒྱལ་དང་ཕྲད་ཚེ། །ཇ་ཆང་ཟང་ཟིང་ནོར་གྱིས་སླུ་ཐབས་ནི་མི་འདུག །ཆ་ལུགས་མི་གར་རོལ་པ་འདི་ཕྱི་ཡི་སྐྱབས་མགོན། །ཅ་རེ་ཐུགས་རྗེའི་སྤྱན་ཟུང་གཡོ་མེད་ཀྱི་ངང་ནས། །ང་དང་ང་འདྲའི་ཐ་ཆད་མཁའ་མཉམ་གྱི་འགྲོ་ལ། །ག་ན་བཞུགས་ཀྱང་ཐུགས་རྗེས་གཡེལ་མེད་དུ་གཟིགས་དང་། །ཁ་དོག་ཡེ་ཤེས་འོད་ལྔའི་གུར་ཁྱིམ་གྱི་ཀློང་དཀྱིལ། །ཀ་དག་གདོད་མའི་རྒྱལ་ས་སྤྲོས་མེད་ཀྱི་ཞིང་དེར། །ནམ་ཞིག་མ་གྱུར་དུས་གསུམ་ཕ་མ་དང་ལྷན་དུ། །གདོད་མའི་མགོན་པོར་མཇལ་བའི་སྨོན་འདུན་ཞིག་ཞུ་འོ།། །།
ཕྱི་ལོ་ ༢༠༠༤ ཟླ་བ་ ༠༡ ཚེས་ ༢༤ རེས་གཟའ་སྤེན་པ།
No comments:
Post a Comment
༄༅། །རྩོམ་ཡིག་འདིའི་ཐད་དགོངས་ཚུལ་འབྲི་སྐབས། ཁྱེད་ཀྱིས་སོ་སོའི་དགོངས་འཆར་གྱི་མཆན་ཡིག་ལ་སྟངས་འཛིན་གནང་དགོས་ན་གུ་གོལ་གྱི་ཁ་བྱང་བེད་སྤྱོད་གནོངས། སྐུང་མིང་གི་ཆ་རྐྱེན་སྤྱད་ན་བཀོད་ཟིན་པའི་མཆན་ཡིག་ལ་བསྐྱར་བཅོས་དང་འབྲི་སུབ་གནང་མི་ཐུབ།