ཀ་རྩོམ་མི་དྲན་དགུ་དྲན།

༄༅། །ཀ་ཋཱ་མཎྜུའི་ཤར་ཕྱོགས་གཤོང་རོང་གི་རྫོང་ཆེན། །ཁ་བ་རི་དང་བལ་པོའི་ས་མཚམས་ཀྱི་ཉེ་འགྲམ། །ག་བུར་རྡུལ་བརྩེགས་རི་ཡི་ཕུ་མདའ་རུ་ཆགས་པའི། །ང་ཡི་ཕ་ས་སྐྱིད་པའི་ཡུལ་ལྗོངས་དེ་དྲན་བྱུང་། །ཅ་ཅོའི་རྩེད་འཇོར་རོལ་པའི་བྱིས་དུས་ཀྱི་སྣང་བ། །ཆ་ཚམ་བརྗེད་མེད་ད་དུང་ཡིད་ཡུལ་ན་འཁོར་ཚེ། །ཇ་མར་རྩམ་སོགས་བཅུད་ལྡན་ཟས་ཕུད་ཀྱིས་སྐྱོང་བའི། །ཉ་གང་འཛུམ་ལྡན་དྲིན་ཅན་ཕ་མ་དེ་དྲན་བྱུང་། །ཏ་ལི་ནགས་ཀྱིས་གང་བའི་ལྷོ་ཕྱོགས་ཀྱི་ཡུལ་དུ། །ཐ་ཤལ་རི་སྤྱང་བཞིན་དུ་འཁྱམས་པ་ཡི་བུ་ངས། །ད་རེས་ཡུལ་གྱི་གནས་ཚུལ་རབ་རོབ་ཙམ་གོ་ཚེ། །ན་ལོ་ཆུང་བའི་སྤུན་རྣམས་བློ་ཡུལ་དུ་དྲན་བྱུང་། །པ་ལོ་དུང་ལྟར་དཀར་བའི་རྒན་རྒོན་གྱི་ཚོགས་རྣམས། །ཕ་གཅིག་ཨོ་རྒྱན་པདྨའི་གསོལ་འདེབས་དེ་སྐྱོར་བཞིན། །བ་སོའི་ཕྲེང་བ་འདྲེན་གྱིན་མཆོད་སྐོར་ལ་འགྲིམ་ཚེ། །མ་གཅིག་ན་ཚོད་ཡོལ་བའི་ཨ་མ་དེ་དྲན་བྱུང་། །ཙ་རི་གནས་བཟང་སྐོར་བའི་གོ་སྐབས་དེ་དོར་ནས། །ཚ་རོང་རྒྱ་གར་ཡུལ་དུ་སྐོར་བ་ལ་གཡེངས་ཏེ། །ཛ་དྲག་ཚེ་འདིར་མཁོ་བའི་ཡོན་ཏན་དེ་དབེན་ཀྱང་། །ཝ་སྐྱེའི་ཟློས་གར་མཁས་པའི་གྲོགས་པོ་དེ་དྲན་བྱུང་། །ཞྭ་ལྟར་མཁས་ལ་བཀུར་ཞིང་དམན་ཕྱོགས་ལ་བྱམས་བརྩེས། །ཟ་འཐུང་ཆོག་ཤེས་ལྡན་པའི་འཚོ་བ་ལ་རོལ་ཏེ། །འ་འུར་ཛ་ལང་སྤྱོད་ལ་ཕྱིར་ཕྱོགས་ཀྱི་ངང་ནས། །ཡ་རབས་གྲལ་དུ་འཁོད་པའི་གྲོགས་པོ་དག་དྲན་བྱུང་། །ར་མ་ལུག་གི་ཆས་དང་ཁ་སྐད་ལ་མཁས་ཤིང་། །ལ་ལུང་གྲངས་མེད་བརྒལ་ནས་ཕྱི་རྒྱལ་ལ་སླེབས་ཚེ། །ཤ་ཚ་ཕ་མའི་ཕྱོགས་ལ་ཕྱི་མིག་ཙམ་མེད་པར། །ས་མཐར་འཁྱམས་པའི་དྲིན་ལན་ལོག་འཇལ་དག་དྲན་བྱུང་། །ཧ་ཧ་སྒོར་མོར་བརྔམས་ཏེ་རིག་གཞུང་དང་ཆོས་ལུགས། །ཧ་ཡོ་ཕངས་མེད་འདོར་བའི་བླུན་པོ་ཡི་ཚོགས་རྣམས། །ཧ་རེ་རང་མགོ་གཞན་གྱིས་བསྐོར་པ་ཡི་འོག་ཏུ། །ཧ་ཧ་རང་ཉིད་སྤྱང་པོར་རློམ་མཁན་དག་དྲན་བྱུང་། །ཨ་ཧོ་ངོ་མཚར་སྤྱི་ཚོགས་གསར་པ་ཡི་ཁྲོད་དུ། །ཨ་སྒོར་ལྗང་གུ་ཡོད་ན་མི་རིགས་དང་རིག་གཞུང་། །ཨ་ཙི་སྣབས་ལུད་འདོར་བའི་ཉམས་ཚོད་ཀྱང་མེད་འདི། །ཨ་ཁ་བསམས་ན་སྙིང་རླུང་ལྡང་རྒྱུ་རུ་དྲན་བྱུང་།། །།ཕྱི་ལོ་ ༢༠༠༤ ཟླ་བ་ ༠༥ ཚེས་ ༠༡? ཉིན།