༄༅། །ན་མོ་གུ་རུ་དེ་ཝ་ཌཱ་ཀི་ཡེ། སྐུ་གཅིག་ཆོས་སྐུའི་ཀློང་ལས་མ་གཡོས་ཀྱང༌།།
ཟུང་གཅིག་གཟུགས་སྐུའི་བཀོད་པས་འགྲོ་བ་ཀུན།།
ཚོགས་གཉིས་རྒྱ་མཚོའི་རྦ་རླབས་དགུང་དུ་འཕྱོ།།
མཁྱེན་གཉིས་རྟོགས་པའི་གཏིང་མཐའ་བསམ་ལས་འདས།།
སྐུ་གཉིས་ནོར་བུའི་མཛོད་ལ་དབང་གྱུར་པའི།།
རྣམ་གཉིས་བསྟན་པའི་མངའ་བདག་ཞབས་བརྟན་གསོལ།།
བསྐལ་གསུམ་ཚོགས་རབ་བསགས་པའི་རྒྱུ་ཉིད་ལས།།
སྐུ་གསུམ་འབྲས་བུའི་དཔལ་གྱིས་འགྲོ་རྣམས་ཀུན།།
དུས་གསུམ་གཡེལ་མེད་སྐྱོང་བའི་མགོན་གཅིག་པུ།།
མཆོག་གསུམ་ངོ་བོ་གཅིག་འདུས་ཞབས་བརྟན་གསོལ།།
གླིང་བཞི་ལྷོ་ཕྱོགས་འཛམ་གླིང་ཡང་ཐོག་ཏུ།།
ལུགས་བཞི་བསྟན་པའི་ཕྱི་མོ་སྔ་འགྱུར་བའི།།
རྣམ་བཞི་བསྟན་འཛིན་དབུས་སུ་ངུར་སྨྲིག་གར།།
སྡེ་བཞི་དཔལ་གྱི་དབང་ཕྱུག་ཞབས་བརྟན་གསོལ།།
ཉོན་མོངས་ལྔ་ཡིས་རང་མཚང་ཕྱིར་ཐོན་པའི།།
སྙིགས་མ་ལྔ་བདོའི་དུས་ཀྱི་གདུལ་བྱ་རྣམས།།
ཕྲིན་ལས་ལྔ་ཡི་མཛད་པས་རབ་བཏུལ་ཏེ།།
འགྲོ་བ་ལྔ་ཡི་རྒྱུན་གཅོད་ཞབས་བརྟན་གསོལ།།
ཕྱིན་དྲུག་སྤྱོད་ལམ་རིང་ནས་གོམས་པའི་མཐུས།།
རིགས་དྲུག་འཁོར་བའི་འགྲོ་ལ་སྙིང་རྗེ་ཡིས།།
དུས་དྲུག་བརྩོན་པའི་གོ་ཆ་རབ་གྱོན་ཏེ།།
ཐབས་དྲུག་སྦྱོར་བར་དབང་ཁྱེད་བརྟན་གསོལ།།
འཕགས་ནོར་བདུན་གྱི་དཔལ་གྱིས་རབ་ཕྱུག་པའི།།
གཏད་རབས་བདུན་ནས་རིམ་བརྒྱུད་བསྟན་པའི་གཞི།།
སོ་ཐར་བདུན་གྱི་རྒྱུད་འཛིན་ཤཱཀྱའི་སྲས།།
རབས་བདུན་རྒྱལ་བའི་རྒྱལ་ཚབ་ཞབས་བརྟན་གསོལ།།
སྡུག་བསྔལ་བརྒྱད་ཀྱི་མེ་འོབས་རབ་འབར་བའི།།
ཆོས་བརྒྱད་བདུད་ཀྱི་བཙོན་རར་ཉམ་ཐག་འགྲོ།།
སྤྲོས་བརྒྱད་ཞགས་པས་བཅིངས་རྣམས་སྒྲོལ་བའི་མགོན།།
རིག་གྲོལ་ཡོན་ཏན་བརྒྱད་ལྡན་ཞབས་བརྟན་གསོལ།།
མཁས་ཚུལ་རྣམ་དགུའི་དཀྱིལ་འཁོར་ཡོངས་རྫོགས་ལས།།
ཐེག་པ་རིམ་དགུའི་ཆོས་ཀྱི་བསིལ་ཟེར་གྱིས།།
བསྐལ་ལྡན་སྐྱེ་དགུའི་ཀུ་མུད་སྐྱེད་མོས་ཚལ།།
སྐྱོང་མཁས་ཐེག་དགུའི་མངའ་བདག་ཞབས་བརྟན་གསོལ།།
ཕར་ཕྱིན་རྣམ་བཅུའི་ཐེམ་སྐས་ཡོངས་བརྒལ་ཏེ།།
རྟོགས་རིགས་ས་བཅུའི་ཁང་ཐོག་ཀུན་ཀྱི་རྩེ།།
རྒྱལ་སྲས་དབང་བཅུའི་ནོར་གྱི་བང་མཛོད་ལས།།
མི་འཇིགས་སྟོབས་བཅུའི་དཔལ་དབང་ཞབས་བརྟན་གསོལ།།
གྲུབ་བརྙེས་རྒྱལ་བའི་གོ་འཕང་མཐོར་གཤེགས་པའི།།
རིག་འཛིན་རྣམ་བཞིའི་དབང་པོ་རྒྱལ་བའི་སྲས།།
པདྨ་འབྱུང་གནས་གངས་ཅན་མགོན་གཅིག་པུའི།།
རྒྱལ་ཚབ་ཡིད་བཞིན་ནོར་བུ་ཞབས་བརྟན་གསོལ།།
མདོར་ན་སྙིགས་མ་ལྔ་བདོའི་འགྲོ་བ་རྣམས།།
རྒྱལ་ཁྲིམས་འཇིགས་ཤིང་ཕྱོགས་རིས་འཁྲུག་ལོང་གིས།།
ངེས་མེད་མནར་བའི་དུས་འདིར་འགྲོ་བའི་མགོན།།
གཞན་ལས་ཁྱད་འཕགས་མཚོ་སྐྱེས་རྒྱལ་བའི་ཚབ།།
ཐུགས་རྗེ་ནུས་མཐུ་ལྷག་པར་བཙན་པ་ཁྱེད།།
འབྲལ་མེད་བདག་ཅག་འགྲོ་བའི་མགོན་དཔུང་དུ།།
འཆི་མེད་རྡོ་རྗེའི་ངོ་བོར་རྟག་བཞུགས་ནས།།
ཕན་བདེའི་འོད་སྟོང་ཕྱོགས་བཅུར་འགྱེད་པར་མཛོད།།
སྤྱི་ལོ་ཟླ་ཚེས་ ༢༠༠༤-༡༡-༢༥ ཉིན།
