རླུང་རྟ་ཐུར་ལ་བརྒྱུགས་ཀྱང་ཁྱད་པར་མི་འདུག

༄༅། །འབྱོར་ལྡན་གླེན་པའི་རྒྱུ་ལ་འགྲམ་ཆུ་མ་ལྡང་།།
འབྱོར་མེད་བློ་ལྡན་འཚོ་བར་ཡི་ག་མ་གཅོད།།
རང་ས་རང་གིས་བཟུང་ནས་ལྷོད་ཀྱིས་བཞུགས་དང་།།
རླུང་རྟ་ཐུར་ལ་བརྒྱུགས་ཀྱང་ཁྱད་པར་མི་འདུག།

མགོ་བདེ་གཡོ་འཕྲུལ་ཅན་ལ་བློ་ཁ་མ་གཏོད།།
ཕུ་ནུ་སྤུན་མཆེད་རྣམས་ལ་རེ་བ་མ་ཆེ།།
རང་གི་ཁྱད་ཆོས་རང་གིས་རྟོགས་ནས་བཞུགས་དང་།།
རླུང་རྟ་ཐུར་ལ་བརྒྱུགས་ཀྱང་ཁྱད་པར་མི་འདུག།

སང་གི་རྨི་ལམ་དེ་རིང་གཏོང་གིན་མ་སྡོད།།
ཁ་སང་ལོ་རྒྱུས་དེ་རིང་གླེང་གིན་མ་བཞུགས།།
ཡོད་རྒུའི་ཐབས་ཤེས་དེ་རིང་རྩལ་སྤྲུག་གྱིས་དང་།།
རླུང་རྟ་ཐུར་ལ་བརྒྱུགས་ཀྱང་ཁྱད་པར་མི་འདུག།

ཡུན་ཐུང་འཚོ་བའི་ཁྲོད་ནས་སྒོར་མོ་སེམས་ཀྱིན།།
སྒོར་མོ་འཚོལ་བའི་ཁྲོད་ནས་མི་ཚེ་འཛད་ཀྱིན།།
མར་ནས་མར་ལ་འགྲོ་བའི་ལམ་ཁ་གཡུགས་དང་།།
རླུང་རྟ་ཐུར་ལ་བརྒྱུགས་ཀྱང་ཁྱད་པར་མི་འདུག།

རྒྱུས་མེད་ས་ཕྱོགས་ཤིག་ན་ལམ་འགྲོ་མ་སྒུག།
དོན་མེད་ཡེངས་མ་ལམ་དུ་མི་ཚེ་མ་གྲོན།།
མདོར་ན་མདུན་བསྐྱོད་གོམ་འགྲོས་གྱེན་ལ་ཕྱོགས་དང་།།
རླུང་རྟ་ཐུར་ལ་བརྒྱུགས་ཀྱང་ཁྱད་པར་མི་འདུག།

ངེས་མེད་ཚེ་ལ་ངེས་པའི་གདེང་ཚོད་མེད་ན།།
དགོས་མེད་སྟོང་བསམ་ཡོད་རྒུའི་རྗེས་སུ་མ་སྙེག།
གཡེལ་མེད་ད་ལྟའི་ལས་འགན་ཁམས་གཙང་སྒྲུབས་དང་།།
རླུང་རྟ་ཐུར་ལ་རྒྱུགས་ཀྱང་ཁྱད་པར་མི་འདུག།

རླུང་རྟའི་ཁ་ཕྱོགས་ཐུར་ནས་ཐུར་དུ་བརྒྱུགས་ཀྱང་།།
རང་གི་ཁ་ཕྱོགས་ནམ་ཡང་གྱེན་དུ་ཕྱོགས་པར།།
རྣམ་ཀུན་གཡོ་མེད་རི་བོའི་ངང་ཚུལ་ཟུངས་དང་།།
རླུང་རྟ་ཐུར་ལ་བརྒྱུགས་ཀྱང་ཁྱད་པར་མི་འདུག། 

ཕྱི་ལོ་ཟླ་ཚེས་ ༢༠༡༣-༠༣-༢༤ ཉིན།