ཐོ་བ།

༄༅། །སྤྱི་དོན་སྒེར་ཐོག་བབས་པའི་དཀའ་ཚེགས་ཁྲོད་ནས།།
ངང་རིང་ཚུགས་ཀ་བརྟན་པའི་གཤིས་རྒྱུད་ཅན་པོ།།
བློ་མཐུན་རྒྱུ་དག་ཅན་གྱི་གྲོགས་མཆོག་རེ་ཡི།།
ཞུམ་མེད་སྤོབས་པའི་ཕྱོགས་སུ་གདེང་འཇོག་མེད་པར།།

སྤྱི་སེམས་ཁ་ལ་འཁྱེར་བའི་གང་ཟག་དག་གིས།།
སྒེར་དོན་ལམ་ལྷོངས་ཡོང་བའི་བྱུས་སྟོང་བར་ནས།།
གཞུང་དོན་སྙིང་བརྐོས་ཅན་གྱི་སྐྱེས་བུ་ཡོད་ཚད།།
བསམས་བཞིན་གཡོག་ལ་བཀོལ་དུས་སྙིང་རླུང་འཚང་གི།

ཀུན་ཕན་གཞུང་དོན་སྒྲུབ་ལ་ངོ་ལྐོག་མེད་པར།།
རེ་དོགས་གཉིས་མེད་ངང་ནས་གཅིག་ཏུ་བརྩོན་ཏེ།།
སྙིང་རུས་དོན་ལྡན་བྱེད་པའི་གྲོགས་བཟང་དག་གི།
འགྱུར་མེད་ལྷག་བསམ་དེ་ལ་ཚོར་ཤེས་མེད་པར།།

རང་དོན་རང་གཅེས་ཡིན་པ་ཧ་གོ་བཞིན་དུ།།
སྙོམ་ལས་རོ་ཉལ་རྒྱག་ལ་སྲེད་པ་ཆེ་བའི།།
ལང་ཤོར་ཁྲེལ་མེད་ཅན་པོས་སྒེར་དོན་ཡོད་རྒུ།།
ཤེས་བཞིན་མདུན་ལ་སྤུང་དུས་ཁྲག་ཤེད་འཕར་གྱི།།

དུས་དང་བབས་ཀྱིས་འཁྲིས་པའི་རང་གི་འགན་འཁྲི།།
ལྷག་བསམ་ཡོད་རྒུ་སྤུངས་ཏེ་བསྒྲུབས་པའི་མཐའ་ལ།།
གོང་འོག་སུ་ཞིག་དགྱེས་པའི་གྲུབ་འབྲས་མེད་རུང་།།
ཞེ་བློ་གཏིང་ནས་བདེ་བ་དེ་དུས་ཡོད་ཀྱང་།།

རང་དོན་རང་ཐག་གཅོད་པའི་སྤོབས་པ་མེད་ཀྱིན།།
སྤྱི་དོན་སྒེར་ཐག་གཅོད་ལ་ཧམ་སེམས་ཆེ་བའི།།
མི་ངན་གྲོགས་བརྫུས་ཅན་གྱི་རེ་དོན་དེ་དག།
རིན་ཆེན་སྲོག་ལ་བསྡོས་ཀྱང་བསྒྲུབ་བྱ་མ་རེད།།

དུས་བཞི་ཀུན་ལ་ཟོལ་ལྡན་ལྗང་མདོག་ངོམ་པའི།།
སྣང་མཐོ་སྨྱུག་སྡོང་རིགས་ཀྱི་མགོ་འཕང་དེ་ཀོ།
འབྲས་ལྡན་ལྗོན་བཟང་དུད་པའི་གོང་ན་ཡོད་ཀྱང་།།
རྣམ་སྨིན་མེ་ཏོག་ཁྲོད་ནས་སྡུག་སྲོག་འཆོར་འགྲོ།།

སྒེར་དོན་དུག་རྫས་ཡིན་ཀྱང་ཧུབ་ཀྱིས་འདྲེན་ལ།།
སྤྱི་དོན་བདུད་རྩི་ལགས་ཀྱང་ས་ལ་འབོ་མཁན།།
ཕྱོགས་རིས་ཕུང་རྐྱེན་སློང་ལ་གཅིག་ཏུ་དགའ་བའི།།
རྨོངས་བྱེད་འཕྲུལ་འཁོར་ཕྱོགས་ལ་བག་ཟོན་མཛོད་ཅིག།

གནམ་ས་འུར་གྱིས་འགེང་བའི་སྣོད་སྟོང་བརྡུངས་ན།།
ཁོར་ཡུག་སུན་གཙེར་ཆེ་བའི་རྒྱུ་ལས་མེད་རུང་།།
ཁོག་སྟོང་མ་བརྡིབས་བར་དུ་ཇི་ཙམ་ལྡིར་ཀྱང་།།
རྡུང་བྱེད་ཐོ་བ་རྡེག་ལ་ངལ་དོན་མི་འདུག།

སྤྱི་ལོ་ཟླ་ཚེས་ ༢༠༡༥-༠༦-༡༩ ཉིན། (སྨྱུག་སྡེའི་ཐོག་ལའང་སྤེལ་ཡོད།)