༄༅། །སྤྱི་མཐུན་བསྟན་འགྲོའི་བསོད་ནམས་ལ་གོད་ཆགས་ཕོག་པའི་དུས་ཚིགས་ཤིག་ཏུ་ཞིག་ཏུ་སྨྲས་ཀྱང་རུང་ལ། སྒོས་སུ་འདི་ཕྱིའི་རེ་ལྟོས་ཅན་བདག་དང་བདག་འདྲ་བའི་ལས་དབང་གི་རྒུད་ཕྱོགས་ཤིག་ཏུ་བསམས་ཀྱང་རུང༌། གང་ལྟར། ཉིན་མོ་དེ་ནས་བཟུང༌། རྟ་བདུན་དབང་པོའི་འོད་སྣང་ཇི་ཙམ་གསལ་རུང༌། སྙིང་ཁམས་ཀྱི་མུན་ནག་འདི་དེ་བས་ཐུ་ལ། བཅོ་ལྔའི་དུང་ཟླ་ཇི་ཙམ་བསིལ་རུང༌། གཟུགས་མེད་སེམས་ཀྱི་ཚ་གདུང་སྔར་ལས་དྲགས།
ད་དུང༌། སྟོང་ཚོ་འདུས་སྡེའི་ཁྲོད་ན་ཇི་ཙམ་གནས་རུང༌། ཁེར་རྐྱང་ལུས་པའི་ཚོར་ཤུགས་དེ་ལས་ཟབ་ལ། འདིར་སྣང་སྲིད་པའི་མཛེས་སྡུག་ཅི་ཙམ་ངོམ་རུང༌། སེམས་ཁམས་སྐྱོ་བས་མནར་བ་སྔར་ལས་ལྷག །
ཀྱེ་མ། འཁོར་བའི་རང་མཚང་ལ་ངོམ་པའི་མཐའ་མེད་ན། སྐྱོ་བའི་མིག་ཆུ་ལ་ཟད་མཐའ་ཞིག་ག་ལ་སྲིད། ངས་འདི་ལྟར་ད་ལྟའི་དུས་ཚོད་ཀྱི་བརྒྱུད་རིམ་ཁྲོད་ནས། འདས་པའི་ལོ་རྒྱུས་ལ་འདང་རྒྱག་ཐེངས་རེར། སེམས་སྡུག་གི་གཙེ་རླུང་སྔར་ལས་ལྡང་ཆེ་ཞིང༌། ཡིད་མུག་གི་ཆུ་འཛིན་སྔར་ལས་འཚུབ་དྲགས་ལ། སྐྱོ་གདུང་གི་ཆར་རླུང་སྔར་ལས་རྒོད་དྲགས་ཤིང༌། གདུང་འབོད་ཀྱི་འབྲུག་སྐད་སྔར་ལས་ལྡིར་དྲགས།
འདི་ལྟར་སེམས་ཁམས་ཀྱི་ནམ་དུས་ལ་འགྱུར་ལྡོག་བྱུང་བའི་དགོང་མོ་ཞིག །ང་དང་ང་འདྲ་བའི་ལྡོམ་བུ་བ་ཁྱུ་གཅིག །ང་དང་ང་འདྲ་བའི་སྤྲང་འཁྱམ་པའི་སྡེ་ཞིག །བཅུ་གཉིས་བདག་པོའི་འོད་སྣང་དང་བྲལ་བའི་མུན་ནག་གི་ཡུལ་གྲུ་ཞིག་ནས། ལས་དབང་གི་རླུང་རྟར་བང་རྩལ་ཞན་པས། འཇིག་རྟེན་འདིར་ཁེར་རྐྱང་དུ་ལུས་པའི་ལོ་རྒྱུས་གླེང་བཞིན། སང་གི་ཉི་གཞོན་ལ་རེ་སྒུག་གི་ཁྲོད་ནས། ཀ་བཤད་ཀྱི་དབྱངས་རྟ་ལས་དྲངས་པའི་རེ་འདུན་གྱི་གསོལ་འདེབས་ཤིག །འདི་ལྟར་གྱེར། འདི་ལྟར།
ན་མོ་གུ་རུ།
སྐྱེ་མེད་ཀ་དག་ཆོས་དབྱིངས་གཉུག་མའི་ཀློང་དང༌།།
འགག་མེད་ཁ་དོག་ལྔ་ལྡན་ལོངས་སྐུའི་ཞིང་ཁམས།།
ངེས་མེད་ག་ན་བཞུགས་ཀྱང་རྗེ་བཙུན་བླ་མ།།
མགོན་མེད་ང་ཚོ་ཐུགས་རྗེས་ནམ་ཡང་མ་འདོར།།
དལ་མེད་ཅ་ཅོ་རྣམ་གཡེང་འདུ་འཛིའི་དཀྱིལ་ན།།
བྲལ་མེད་ཆ་ལུགས་ཆོས་པའི་གཟུགས་སུ་གནས་ཀྱང༌།།
ལོང་མེད་ཇ་ཡུན་ཙམ་ཡང་དམ་པའི་ཆོས་ལ།།
སེམས་མེད་ཉ་མ་ང་ཚོ་ཐུགས་རྗེས་མ་འདོར།།
ན་ནིང་ཏ་ལེར་གང་སྐུ་མཚན་དཔེའི་ཉི་མ།།
ཚུར་མཐོང་ཐ་མལ་མིག་གི་ཡུལ་ལས་འདས་པས།།
ཀྱེ་མ་ད་དུང་མགོན་མེད་མུན་པར་འཕྱན་པའི།།
སྐྱབས་བྲལ་ན་མཉམ་ང་ཚོ་ཐུགས་རྗེས་མ་འདོར།།
གནག་སྣུམ་པ་ལོ་བྲེགས་ཏེ་ཚེ་རབས་གཏན་གྱི།།
སྐྱབས་གནས་ཕ་གཅིག་རྗེ་བཙུན་ཁྱེད་ལ་བཅོལ་ཀྱང༌།།
འདོད་ཡོན་བ་ཚྭའི་རྒྱ་མཚོར་བྱིངས་པ་བདག་ལ།།
ཀྱེ་མ་མ་གཡེལ་ཐུགས་རྗེས་འབྲལ་མེད་གཟིགས་དང་།།
དབེན་གནས་ཙ་རི་ལྟ་བུའི་རི་ཁྲོད་མ་ཟིན།།
འཕགས་ཡུལ་ཚ་བའི་གྲོང་ན་གཞན་ཕན་མ་གྲུབ།།
ཨ་ཁ་ཛ་དྲག་འདི་ཕྱིའི་འདུན་ལམ་བོར་བའི།།
ངང་ཚུལ་ཝ་ལེར་སེམས་བཞིན་སྐྱོ་བའི་ཀློང་ནས།།
ཀྱི་ཧུད་ཞ་ར་ཐང་སྟོང་འགྲིམ་པ་བཞིན་དུ།།
གཏད་མེད་ཟ་ཟི་འཁོར་བའི་གནས་རིས་འདི་ན།།
མགོན་མེད་འ་ཅག་དུཿཁའི་སྨག་རུམ་ཁྲོད་དུ།།
དབང་མེད་ཡ་ངའི་གནས་སུ་ལྷུང་བ་གཟིགས་ན།།
ཐུགས་རྗེའི་ར་མདའ་བཙན་པོ་གཡེལ་མེད་ངང་ནས།།
མ་འགྱངས་ལ་འུར་སྤྲུལ་པའི་མགོན་དཔུང་དམ་པ།།
ཚད་མེད་ཤ་ཚའི་མཐུ་དཔུང་བསྐྱེད་ཐེངས་ཤིག་གིས།།
མྱུར་དུ་ས་སྟེང་འགྲོ་བའི་དཔལ་དུ་འབྱོན་རོགས།།
ཀྱི་ཧུད་ཧ་ཅང་སྐྱོ་བའི་སྨག་རུམ་ཁྲོད་ནས།།
ཀྱེ་མ་ཨ་སྡུག་བུ་ཡི་གདུང་འབོད་གསན་ན།།
རབ་འབྱམས་རྒྱལ་བའི་ཞིང་ཕྱོགས་གང་ན་བཞུགས་ཀྱང་།།
ཐུགས་རྗེའི་རྣམ་རོལ་ས་སྟེང་འདི་ན་འབྱོན་རོགས།།
མུན་ནག་གི་དགོང་མོར་མིག་ཆུས་ཁུར་ཚོས་བརླན་པ་མི་མཐོང་ཡང་། ངག་སྐད་མཆི་མས་བརྣངས་པའི་གསོལ་འདེབས་འདིས་སྐྱོ་ལྷང་ལྷང་གི་ཚོར་སྣང་ཞིག་སུ་ལའང་བྱིན།
