༄༅། །ཐེག་ཆེན་ཆོས་ཀྱི་གླེགས་བམ་ཀློག་ཐེངས་རེ་རེར།།
ཟབ་རྒྱས་ཆོས་ཀྱི་རྣམ་གྲངས་དཔག་མེད་མཇལ་ཀྱང༌།།
བྱང་སེམས་ཆོས་ཀྱི་རྩ་བ་མ་ཚུགས་བར་དུ།།
བློ་སྦྱོང་དོན་ལ་བརྩོན་པ་དམ་བཅའ་ལགས་སོ།།
བཀའ་བསྟན་གཞན་ལ་འཆད་པའི་ངལ་རྩོལ་ཁྲོད་ནས།།
ཕྱིར་བལྟས་ཁ་ཡི་བཤད་སྒྲོས་ཇི་ཙམ་མཁས་ཀྱང༌།།
རང་རྒྱུད་ཆོས་དང་འདྲེས་པའི་གདེང་ཞིག་མེད་ན།།
སྒྲ་འཛིན་འཕྲུལ་ཆས་དེ་ཡི་ངང་ཚུལ་འདུག་པས།།
ཕྱི་ནང་དབུགས་ཀྱི་རྒྱུ་བ་མ་ཆད་སྔོན་དུ།།
རང་ཁ་ནང་དུ་སྐོར་བ་དམ་བཅའ་ལགས་སོ།།
རྟགས་གསལ་ཕར་ལ་འཕེན་པའི་ཐལ་སྒྲའི་འོག་ན།།
ལུས་ཀྱི་འགྱིང་བག་ངོམ་པའི་རྩལ་ཆེན་རྫོགས་ཀྱང༌།།
གོ་རྟོགས་ནང་ནས་རྙེད་པའི་ངེས་ཤེས་མེད་ན།།
ཚིག་རྩོད་སྐམ་པོར་མཁས་ཀྱང་དོན་མེད་འདུག་པས།།
དལ་རྟེན་ཆུ་ཟོས་གཏོང་སའི་རྩོད་ར་སྤངས་ནས།།
ཁེར་རྐྱང་མ་ཎི་འདྲེན་པ་དམ་བཅའ་ལགས་སོ།།
ཚེ་འདིར་མཚུངས་མེད་བླ་མའི་ཞལ་རས་མཇལ་ཞིང༌།།
དབང་ལུང་གདམས་པའི་མན་ངག་མང་དུ་ཐོས་ཀྱང༌།།
རིག་པ་རང་ངོ་འཕྲོད་པའི་ཉམས་ལེན་མེད་ན།།
འཛིན་ཞེན་རྟོག་པའི་འཁྲུལ་སྣང་ཟད་ཐབས་བྲལ་བས།།
སྔོན་བྱོན་དམ་པའི་ཤུལ་ལམ་མ་སྙོགས་བར་དུ།།
བརྩོན་པའི་ངལ་བ་མི་ལྷོད་དམ་བཅའ་ལགས་སོ།།
