༄༅། །བསླུ་མེད་རྒྱུ་འབྲས་བདེན་པའི་གནས་ལུགས་དོན།།
འཁྲུལ་མེད་གསལ་ལེར་གཟིགས་པའི་སྤྱན་ལྡན་དྲུང་།།
འབྱོར་ལྡན་མཇུག་ལ་རྒྱུགས་པའི་བང་རྩལ་དང་།།
འབྱོར་མེད་སྔོན་ལ་འགྱིངས་པའི་ཉམས་ཆེན་གྱིས།།
ཡོངས་སུ་ཕོངས་པའི་ངང་ཚུལ་མངོན་པ་འདི།།
སྙིང་རྗེའི་ཡུལ་དུ་གྱུར་པའང་ག་ལ་ཡིན།།
རྣམ་དག་ལྷག་བསམ་དག་པས་སྤྱི་སྒེར་ལ།།
ཕན་པའི་བྱ་གཞག་སྒྲུབ་པའི་འཁོས་ཀ་ཅན།།
ཀུན་གྱིས་མིག་ལྟོས་བྱེད་སའི་ཡུལ་མཆོག་ཏུ།།
གྱུར་པའི་ཚད་ལྡན་མི་སྣ་མ་ཡིན་ཡང་།།
སྤྱི་ཕན་བློ་ཡིས་ལྷོད་མེད་འབད་བརྩོན་ངང་།།
ཀུན་ཕན་སྲི་ཞུ་སྒྲུབ་པའི་གང་ཟག་གི།
ཕུན་ཚོགས་ལེགས་རྒུ་སེམས་ཀྱིས་མ་བཟོད་ནས།།
བར་དུ་གཅོད་པའི་བདུད་སྡེའང་ག་ལ་ཡིན།།
སྤྲེལ་ལད་གཡོ་སྒྱུ་ངོ་སྲུང་བཅོས་མའི་རིགས།།
ཡོད་ཚད་དགྲ་རུ་བཟུང་བའི་ལྟ་ཚུལ་འོག།
ཀུན་ལ་ཡིད་ཆེས་བྱེད་སྟངས་མ་ཤེས་པས།།
དོགས་པའི་གནས་སུ་རྒྱུ་བ་བདེན་ན་ཡང་།།
བློ་སེམས་མཐུན་པའི་གྲོགས་མཆོག་དྭངས་མ་དང་།།
ལྷག་བསམ་ཅན་གྱི་གཟུར་གནས་སྐྱེ་བོ་ལའང་།།
བཟང་ངན་གཅིག་ཏུ་འདོད་པའི་ལོག་ལྟའི་འོག།
ཡིད་ཆེས་བོར་པའི་སྡེ་པའང་ག་ལ་ཡིན།།
ལག་པ་གཅིག་གིས་ཐལ་མོ་འདེབས་པ་དང་།།
རྐང་པ་གཅིག་གིས་ཞབས་བྲོ་འཁྲབ་སྟངས་ཤིག།
ཡོང་ཐབས་མེད་ཅེས་འཇིག་རྟེན་རྒན་པོ་ཡི།།
ཞལ་རྒྱུན་དེ་ཀོ་ཤིན་ཏུ་མད་ན་ཡང་།།
སོར་བཅུ་གཏུགས་པའི་ཐལ་མོའི་འདེབས་ལུགས་དང་།།
རྐང་གཉིས་གཡུག་པའི་ཞབས་བྲོའི་ཁྲབ་ལུགས་འདི།།
འདུལ་བའི་གཞུང་ན་ཆེད་དུ་བཀག་འདུག་པས།།
བསམ་བཞིན་བྱེད་མཁན་དེ་འདྲའང་ག་ལ་ཡིན།།
གླིང་སྐོར་བྱེད་སའི་ལམ་མདོ་དེ་དག་ཏུ།།
ཕྱི་ནང་བར་གྱི་བཟང་ངན་གནས་ཚུལ་ཀུན།།
རང་སྣང་སྐྱིད་པའི་ངང་ནས་ཕན་ཚུན་བར།།
གླེང་འདྲེན་བྱེད་པའི་གཤིས་ཀ་ཆེ་ན་ཡང་།།
ཕྱོགས་དང་རིས་སུ་ཆད་པའི་བློ་ཡི་འོག།
དཀར་ནག་ཚོན་རྩིས་རང་གཞན་གཉིས་ཀྱི་བར།།
ཁྱད་པར་བཞག་ནས་ཕུ་དཀྲུགས་མདའ་དཀྲུགས་ཀྱིས།།
སྤྱི་ཚོགས་ཕུང་དུ་འཇུག་མཁན་ག་ལ་ཡིན།།
ཟ་ཉལ་འགྲོ་འདུག་སྤྱོད་ལམ་ཡོད་ཚད་ཀུན།།
དྲན་ཤེས་བག་ཡོད་ལྡན་པའི་ཀུན་སློང་འོག།
བཙན་གྱིས་བཅུར་བའི་ཚུལ་འཆོས་རྣམ་དག་ལ།།
གོམས་གཤིས་མེད་པའི་ནོར་འཁྲུལ་ཆེ་ན་ཡང་།།
ལས་འབྲས་རྒྱབ་ཏུ་སྐྱུར་བའི་སྙིང་སྟོབས་འོག།
ལོག་འཚོ་དཀར་པོར་སྒྲུབ་པའི་ཐབས་ཤེས་ཀྱིས།།
མཆོག་གསུམ་སྐྱབས་སུ་སྦྲན་པའི་གསོལ་འདེབས་ལྷན།།
དགེ་སྦྱོང་གྲལ་ལ་འགྲིམ་མཁན་ག་ལ་ཡིན།།
མཐོ་མཐའ་ལྷུང་བའི་གནས་ལ་ཡིད་ཆེས་ཀྱིས།།
དམའ་ས་བཟུང་བའི་ཉམ་ཆུང་སྡེ་པ་འདིའི།།
རེ་དོགས་གཉིས་མེད་འཚོ་བའི་བདེ་སྐྱིད་ལ།།
གུ་ཡངས་ལོངས་སུ་སྤྱོད་པ་དགའ་ན་ཡང་།།
ངོ་སྲུང་སྤྲེལ་ལད་དོར་བའི་རྣམ་སྨིན་གྱིས།།
མདུན་ནས་མདུན་དུ་སྐྱོད་པའི་རེ་བྲལ་འོག།
རྒྱབ་ནས་རྒྱབ་ཏུ་ནུར་བའི་ལྐུག་རྟགས་ལྷན།།
མི་ལུས་དོན་མེད་བྱེད་མཁན་ག་ལ་ཡིན།།
འཁོར་བའི་ཆོས་ལ་བཅོས་མིན་ངེས་འབྱུང་གིས།།
འདི་སྣང་ཕུན་ཚོགས་ཡོད་དགུ་བློས་བཏང་ནས།།
མི་མེད་ལུང་སྟོང་འགྲིམས་པའི་བྱ་བྲལ་བ།།
རྗེ་བཙུན་མི་ལའི་རྗེས་འབྲང་མིན་ན་ཡང་།།
ཐོབ་དང་གོ་ས་སྙན་གྲགས་ཡོད་ཚད་ལ།།
མིང་དོན་མཚུངས་པའི་ཤེས་འཇོན་མེད་བཞིན་དུ།།
སྲོག་ལ་བབ་ཀྱང་ལེན་ཐབས་བརྩོན་པ་ཡིས།།
ཚུལ་མིན་ཆོས་བརྒྱད་སྒྲུབ་མཁན་ག་ལ་ཡིན།།
ལུས་ངག་བཅོས་མའི་རྣམ་འགྱུར་ཁོ་ན་ཡིས།།
བདེན་པའི་གནས་ལུགས་འདྲེན་པའི་གཏན་ཚིགས་སུ།།
རང་གོ་ཆོད་པར་འཛིན་པའི་ལྟ་ཚུལ་ལ།།
གཅིག་ཏུ་རྒོལ་བའི་རང་གཤིས་བདེན་ན་ཡང་།།
ཚུལ་མིན་ཡ་མ་ཟུང་གི་སྤྱོད་ལམ་འོག།
སྤྱི་སྒེར་ཀུན་གྱི་རྐང་པ་འདྲེན་བཞིན་དུ།།
ཡོད་ཚད་བསམ་པའི་ཁྱད་ལ་རགས་ལས་ཞེས།།
གཙོ་སེམས་སྨྲ་བའི་སྡེ་པའང་ག་ལ་ཡིན།།
ཐུན་མོང་ཐུན་མིན་གཞུང་ལུགས་སྣ་ཚོགས་ལ།།
བགྲང་བྱ་རྣམ་དགུའི་ཐོས་བསམ་གྲུབ་པའི་རྗེས།།
རང་རྒྱུད་དུལ་བའི་གྲུབ་རྟགས་རྣལ་མ་ཞིག།
མངོན་རྒྱུ་མེད་པ་ཤིན་ཏུ་བདེན་ལགས་ཀྱང་།།
བཤེས་གཉེན་དམ་པས་གནང་བའི་སློབ་སྟོན་ཀུན།།
ཡོད་ཚད་གོ་ལོག་ཐེབས་པའི་རྐྱེན་དབང་གིས།།
སྦྱངས་ཚད་ལོག་འཚོ་སྒྲུབ་པའི་ཆ་རྐྱེན་དུ།།
སྤྱོད་པའི་དམ་ཉམས་དེ་འདྲའང་ག་ལ་ཡིན།།
རྣམ་བཞི་དགེ་སྦྱོང་ཆོས་ཀྱི་ཉམས་ལེན་ལ།།
རྣམ་ཀུན་གནས་པའི་འདུལ་འཛིན་མཁན་པོ་ཡི།།
རྣམ་དག་རྗེས་འབྲང་རང་བློ་ཚིམས་པའི་ངང་།།
རྣམ་གྲོལ་ལམ་ཞུགས་དེ་འདྲ་མ་ཡིན་ཡང་།།
བསྟོད་སྨད་བཟང་ངན་གཏམ་ལ་བདེན་འཛིན་གྱིས།།
དགའ་སྡུག་ཚོར་བ་སྐྱེན་པོས་ཟིན་པའི་འོག།
སྐྱིད་སྡུག་གཉིས་པོའི་བླང་དོར་བྱེད་པ་ལ།།
རྣམ་ཀུན་བརྩོན་པའི་བྱབ་ཆུང་ག་ལ་ཡིན།།
རྒྱལ་ཁ་མ་ལུས་གཞན་ལ་སྟེར་ནུས་ཤིང་།།
ཕམ་ཁ་ཇི་སྙེད་རང་གིས་ལེན་ནུས་པའི།།
བློ་འདས་སེམས་དཔའི་རྣམ་ཐར་གཙང་མ་ལ།།
སློབ་པའི་ཐེག་ཆེན་གྲས་སུ་མི་གཏོགས་ཀྱང་།།
སྐྱོན་ཆ་མཐའ་དག་གཞན་ལ་འགེལ་བ་དང་།།
ལེགས་ཆ་ཡོད་དགུ་རང་གི་འཇོན་ཐང་དུ།།
འདྲེན་པའི་གཤོག་ཟུང་བརྐྱངས་ནས་སྤྱི་ཚོགས་ཀྱི།།
ནམ་འཕང་གཅོད་མཁན་དེ་འདྲའང་ག་ལ་ཡིན།།
ཚུར་མཐོང་མ་དག་བློ་ཡིས་སྣང་བ་ཀུན།།
དག་པ་ལྷ་རུ་སྒྲུབ་པའི་ལྟ་བ་ཡིས།།
འཁྲུལ་སྣང་བཙན་ཐབས་གཅོད་པའི་ཉེ་ལམ་ནས།།
སྣང་སྲིད་དག་པར་སྦྱོང་ཚུལ་མ་ཤེས་ཀྱང་།།
ཚུལ་ལྡན་མཆོད་པར་འོས་པའི་སྐྱེས་བུ་ལ།།
ཤེས་བཞིན་ལོག་པར་ལྟ་བའི་ཉེས་དམིགས་ཀྱིས།།
བསམ་བཞིན་ངན་སོང་གསུམ་གྱི་གཡང་ས་རུ།།
མཆོང་རྒྱུག་བྱེད་པའི་སྡིག་ཅན་ག་ལ་ཡིན།།
དཔལ་ལྡན་བླ་མས་གནང་བའི་མན་ངག་ལ།།
ཉམས་ལེན་གནད་དུ་ཕྱིན་པར་མ་ནུས་པས།།
འཆི་ཁ་རང་མགོ་ཐོན་པའི་གང་ཟག་གི།
གྲལ་ནས་འབུད་པའི་གནས་ཚུལ་བདེན་ན་ཡང་།།
ཐོབ་དང་གོ་སའི་བདག་རྐྱེན་འཚོལ་སྒྲུབ་ཆེད།།
ཟབ་རྒྱས་གདམས་ངག་ཡོད་དགུ་ཞུས་པའི་མཐར།།
དབང་ལུང་ཆོས་འཚོང་བྱས་པའི་ནག་ཉེས་འོག།
དམྱལ་བའི་ཁྲིམས་ར་འགྲིམ་མཁན་ག་ལ་ཡིན།།
འདུལ་བའི་དགག་སྒྲུབ་བསླབ་བྱ་མ་ལུས་པ།།
ཞིབ་ཕྲའི་ལམ་ནས་གཅེས་པའི་མིག་བཞིན་དུ།།
སྲུང་བའི་ཚུལ་ལྡན་བཙུན་པ་རྣམ་དག་ཅིག།
ཡོང་བའི་ནུས་སྟོབས་རྒྱུད་ལ་མ་ཚང་ཡང་།།
སྡོམ་རོ་རུལ་བའི་ཚུལ་འཆལ་དྲི་ངན་གྱིས།།
སྦགས་པའི་རང་ཚུགས་དགེ་སྦྱོང་ན་བཟའི་ནང།།
བཅབས་ནས་རང་ཉིད་གཙང་མར་རློམ་པ་ཡི།།
བསྟན་པའི་ནང་གཤེད་དེ་འདྲའང་ག་ལ་ཡིན།།
མདོར་ན་ཚེ་འདིར་ཡོད་ཚད་དྲང་བདེན་དང་།།
ཡང་དག་འཚོ་བའི་བརྒྱུད་རིམ་ཁོ་ན་ཞེས།།
འཁྲུལ་མེད་དཀར་རྐྱང་ཅན་གྱི་དུང་མདོག་ཅིག།
ངོམ་རྒྱུ་མེད་པ་ཤིན་ཏུ་བདེན་ན་ཡང་།།
ཉེས་པའི་མེ་ལྕེ་ཁོག་ཏུ་འབར་དྲགས་པས།།
རང་རྒྱུད་ཚིག་པའི་དུད་དྲེག་མངོན་བཞིན་དུ།།
གནོང་འགྱོད་བྲལ་བའི་ཁྲེལ་མེད་རང་བཞིན་གྱིས།།
དཀར་མདོག་བཙན་གྱིས་ངོམ་མཁན་ག་ལ་ཡིན།།
ཕ་མ་གཅིག་གི་བུ་ཕྲུག་མ་ལགས་ཤིང་།།
ལུང་ཚན་གཅིག་གི་ཁྱིམ་མཚེས་མ་ཡིན་པས།།
རྒྱུས་མེད་ཁག་ཅིག་མི་ཡུལ་ས་མཐའ་ནས།།
མ་བགྲོས་ལྷན་འཛོམས་ཡིན་པ་བདེན་ན་ཡང་།།
ཚེ་སྟོད་ཆོས་ར་འགྲིམས་སའི་གླིང་ག་ནས།།
ཐོས་བསམ་ལྷན་དུ་བྱས་པའི་བརྒྱུད་རིམ་ཁྲོད།།
སྐྱིད་སྡུག་མཉམ་དུ་འཁུར་བའི་ལོ་རྒྱུས་ཀུན།།
བསམ་བཞིན་རྗེད་དུ་འཇུག་མཁན་ག་ལ་ཡིན།།
འདི་ཕྱིའི་སྐྱབས་མགོན་ཆུ་བུར་མིག་ལམ་ནས།།
བསྐལ་པའི་དུས་ངན་འདི་འདྲའི་ཀློང་དཀྱིལ་ན།།
བླང་དོར་མིག་ཟུང་ལོང་བའི་སྤྱི་ཚོགས་ཁྲོད།།
ལྷག་འདི་བསོད་བདེ་ཟད་རྟགས་ཡིན་ན་ཡང་།།
སྔོན་བསགས་དགེ་འབྲས་རྣམ་དཀར་བསོད་ནམས་དཔལ།།
ཚེ་འདིར་མངོན་དུ་གྱུར་པའི་གོ་སྐལ་ལ།།
གྲུབ་དབང་བླ་མའི་གདུལ་བྱར་གྱུར་པ་འདི།།
བསམས་ཤིང་བསམས་ན་ལས་ངན་ག་ལ་ཡིན།།
འཚོ་བའི་ཡུན་ལ་འབྲལ་མེད་ལྷན་ཅིག་ཏུ།།
གནས་པའི་གོ་སྐབས་རང་གཞན་སུ་ལ་ཡང་།།
མེད་པ་དེ་ཀོ་འདུས་མཐའ་འབྲལ་དགོས་པའི།།
ཟློག་མེད་ཆོས་ཉིད་ཡིན་པ་བདེན་ན་ཡང་།།
མཚུངས་མེད་དྲིན་ཅན་བླ་མས་དབུ་འཛིན་ཏེ།།
དཀྱིལ་འཁོར་གཅིག་ཏུ་འཚོགས་པའི་གྲལ་མཐའ་ནས།།
བྱང་ཆུབ་བར་དུ་འབྲལ་མེད་ལྷན་འཛོམས་ཀྱི།།
སྨོན་ལམ་བཏབ་ཚད་དོན་མེད་ག་ལ་ཡིན།།
ངེས་མེད་ཚེ་འདི་ངེས་མེད་མི་ཡུལ་དུ།།
ངེས་མེད་དུས་སུ་ངེས་མེད་གྲོགས་དང་ལྷན།།
ངེས་མེད་གནས་སུ་ངེས་མེད་འགྲིམས་འགྲིམས་ནས།།
ངེས་མེད་ངང་ནས་རྫོགས་རྒྱུ་བདེན་ན་ཡང་།།
དགོས་མེད་བྱ་བའི་ཀློང་ནས་བྲེལ་ཚུབ་ངང་།།
འགྲུབ་མེད་འཆར་གཞི་སྣ་ཚོགས་གླེངས་གླེངས་ནས།།
ཟིན་མེད་རྙོག་གྲས་བློ་ཁ་མི་བདེ་བཞིན།།
དོན་མེད་ངང་ནས་རྫོགས་རྒྱུའང་ག་ལ་ཡིན།།
སྙན་ངག་མཁན་པོའི་སྒྱུ་རྩལ་རྫོགས་པ་ཡི།།
སྙན་པའི་རྗོད་བྱེད་ཡོད་དགུ་རྩལ་བཏོན་གྱིས།།
དོན་མཐུན་བློ་ལ་བབ་པའི་བརྗོད་བྱ་ཀུན།།
གཅིག་ཏུ་བསྡོམས་ནས་བྲིས་པ་མ་ལགས་ཀྱང།།
རང་དང་བློ་མཐུན་གྲོགས་ཀྱི་ཡང་རྩེ་ལ།།
དྲན་པའི་སྐྱེས་སུ་བཞག་པའི་ཚིགས་བཅད་འདི།།
ནམ་ཞིག་ཁེར་རྐྱང་ལུས་པའི་ཚོར་སྣང་ཁྲོད།།
དབྱངས་སུ་གྱེར་ན་མི་རུང་ག་ལ་ཡིན།།
སྤྱི་ལོ་ཟླ་ཚེས་ ༢༠༡༡-༠༩-༢༢ ཉིན།
